2026 жылдың басынан бастап Қазақстанның телекоммуникация нарығында жаңа қауіпсіздік ережелері күшіне енді. Енді азаматтар бір адамның атына 10-нан астам нөмір тіркей алмайды, ал әрбір байланыс қызметі тек бет-әлпетті тану (биометрия) арқылы қосылады.
Жасанды интеллект және цифрлық даму министрлігі байланыс операторлары алаяқтық схемалармен күресті жаңа деңгейге шығарғанын хабарлады. Жаңа талап бойынша, жеке тұлғалар тек отбасылық және жеке мұқтаждығы үшін 10 SIM-картаға дейін иелене алады. Бұл шектеу алаяқтардың мыңдаған нөмірді жаппай сатып алып, оларды заңсыз мақсатта пайдалануына тосқауыл қою үшін енгізіліп отыр. Егер абонентке қосымша нөмір қажет болса, ол әрбір құрылғының мақсатын ресми түрде негіздеуі тиіс.
«Бұл шешім нөмірлерді жаппай тіркеу арқылы жасалатын алаяқтық схемалардың жолын кесуге бағытталған», делінген министрлік хабарламасында.
Сондай-ақ бұдан былай SIM-картаны делдалдар арқылы немесе құжатсыз сатып алу мүмкін болмайды. Байланыс операторлары қызмет көрсетуді абоненттің жеке басын биометриялық сәйкестендіруден өткізгеннен кейін ғана бастайды. Бұл талап бизнес секторға да қатысты: компания қызметкерлеріне берілетін корпоративтік нөмірлер де әрбір маманның жеке басын растауы арқылы ғана іске қосылады.
«Мұндай тәсіл телефон нөмірлерін жасырын пайдалануды болдырмай, олардың заңды әрі жауапты қолданылуын қамтамасыз етеді», деп қосты ведомствода.
Сонымен қатар Ұлттық Банктің Антифрод-орталығы мен байланыс операторларының бірыңғай жүйеге бірігуі күдікті нөмірлерді жедел анықтауға мүмкіндік береді. Алаяқтық белгілері бар қоңыраулар тіркелген бойда, операторлар абонент нөмірін бұғаттап, байланыс қызметін тоқтатады. Бұл шаралар елдегі киберқылмыс деңгейін айтарлықтай төмендетеді деп жоспарланып отыр.
