30 сәуірден бастап еліміздегі екі мыңға жуық мектептің 100 мыңнан астам 4-ші және 9-шы сынып оқушылары арасында білім мониторингі өткізіледі, деп хабарлайды QazMonitor.
Бұл мониторинг – оқушылардың білім сапасын бағалауға бағытталған отандық зерттеу құралы. Ол оқу бағдарламаларының тиімділігін талдауға және оқу-тәрбие процесіндегі жетілдіруді қажет ететін тұстарды анықтауға мүмкіндік береді. Мониторингтің негізгі нәтижесі – білім сапасын арттыру мақсатында әр өңір бойынша кешенді талдау жасап, әдістемелік ұсыныстар әзірлеу.
Зерттеу функционалдық сауаттылықтың оқу, математикалық және жаратылыстану бағыттарын қамтиды. Сонымен қатар білім алушылардың жетістіктеріне әсер ететін түрлі контекстік факторларды анықтау үшін қосымша сауалнама жүргізіледі. Оны оқушылар, педагогтер, мектеп басшылары және 4-сынып оқушыларының ата-аналары толтырады.
Мониторинг рәсімі стандартталған және халықаралық тәсілдерге сәйкес ұйымдастырылған. Еске салайық, 2025 жылдың басында білім алушылардың білім жетістіктерінің мониторингі халықаралық RCEC сапа белгісін алған болатын.
