Алматыда төмен эмиссиялы аймақ (LEZ) пилоттық режимде іске қосылды, деп хабарлайды QazMonitor.
Мегаполис әкімдігінің мәліметінше, пилоттық режим Бөгенбай батыр көшесінен оңтүстікке қарай, Абай даңғылынан солтүстікке қарай, Желтоқсан көшесінен шығысқа және Достық даңғылынан батысқа қарай орналасқан аумақта жүзеге асырылып жатыр.
Қазіргі кезеңде жүйе сынақ режимінде жұмыс істейді. Жүргізушілер үшін қозғалысқа шектеу, айыппұл немесе кіру ақысы қарастырылмаған. Бұл кезеңде цифрлық инфрақұрылымы сынақтан өткізіліп, көлік ағыны мен олардың ауа сапасына әсері туралы деректер жиналады.
Сынақ режимі аясында келесі жұмыстар жоспарланған:
«Ақылды» камералардың, радарлық сенсорлардың және көлікті автоматты тану жүйелерінің нақты ауа райы мен жол жағдайында дұрыс жұмыс істеуін тексеру.
Көлік ағыны мен ауа сапасы датчиктерінің дерегін сәйкестендіріп, белгілі бір аумақтағы трафиктің экологияға әсері туралы объективті көрініс қалыптастыру.
Деректерді қорғаулы арналар арқылы беру жүйесін реттеу және ІТ-мамандар, экологтар мен жол қозғалысын басқару қызметтері арасындағы өзара іс-қимылды пысықтау.
Қалалық мобильділікке терең талдау жүргізуге және «ақылды қала» стратегиясын әзірлеуге қажетті деректер базасын қалыптастыру.
Болашақта нақты деректерге сүйене отырып, қаланың ауасын жақсартуға мүмкіндік беретін сенімді цифрлық негіз қалыптастырамыз, деді басқармада.
Айта кетейік, сынақ кезеңі 2026 жылы 31 желтоқсанға дейін жалғасады. Көрсетілген аумақта қозғалыс қалыпты режимде жүзеге асырылады.
