Үкімет отырысында Энергетика министрі Ерлан Ақкенженов газ саласын дамытудың жаңа жоспарларымен бөлісті. Министрдің айтуынша, қазіргі уақытта жер қойнауының 14 учаскесінде жұмыстар жүріп жатыр, олардың алдын ала ресурстық әлеуеті 515 млрд текше метрді құрайды, деп хабарлайды QazMonitor.
Министрлік орта мерзімді перспективада геологиялық барлау портфелін едәуір ұлғайтуды көздеп отыр.
«Геологиялық барлау портфелін газдың жиынтық ресурстық бағасы шамамен 1,7 трлн. текше метр болатын 30 учаскеге дейін кеңейту көзделеді. Бұл өндірісті ұлғайту және болжамды ішкі сұранысты жабу үшін тұрақты негіз қалыптастыруға мүмкіндік береді», деді министр.
Сонымен қатар ол инвестициялық белсенділікті арттыру және геологиялық тәуекелдерді оңтайландыру мақсатында мемлекет жер қойнауының 50-ге жуық учаскесін электрондық аукционға шығару жоспарланғанын айтты. Бұл учаскелерде геологиялық барлау жұмыстарын қаржыландыру «QazaqGaz», «Самұрық-Қазына» және инвесторлардың қаражаты есебінен қамтамасыз етілетін болады.
