Әлемге танымал спорттық киімдер өндіруші компания Түркістан облысында жобаларын жүзеге асыруға ниетті. Бұл ақпаратты Түркістан облысының әкімі Нұралхан Көшеровтің шетелдік инвестормен кездесуінен кейін облыс әкімдігі таратты, деп хабарлайды QazMonitor.
Ақпаратта шетелдік компания өкілі өңірдің инвестициялық тартымдылығына, соның ішінде мақта шаруашылығының даму деңгейіне жоғары баға бергені айтылған. Инвестор осы ресурстық базаны пайдалана отырып, Түркістан қаласында спорттық киім тігетін зауыт салуға ниетті екенін білдірген.
Келіссөздер барысында инвесторларға облыстың индустриалды әлеуеті таныстырылды. Атап айтқанда, инфрақұрылым мен индустриалды аймақтардың дайындығы, өңірдің тиімді географиялық орналасуы мен көлік дәліздері, жұмыс күшінің қолжетімділігі мен инвесторларға арналған жеңілдіктер мен қолдау тетіктері таныстырылды.
Өңір басшысы Нұралхан Көшеров Түркістан облысында шетелдік және отандық капитал үшін қолайлы жағдай жасалғанын атап өтіп, бірлескен жобаларды қолдауға дайын екенін жеткізді.
