QazMonitor-дың хабарлауынша, 2025 жылы Қазақстанда республикалық бюджеттен зейнетақы төлеуге 4 трлн 225 млрд теңге бағытталған. Оның 1,36 трлн теңгесі базалық зейнетақыға, ал 2,85 трлн теңгесі ынтымақты зейнетақы төлеуге жұмсалған.
Жыл қорытындысы бойынша елдегі зейнеткерлер саны 2 млн 491 мың адамды құрады. Орташа жиынтық зейнетақы мөлшері 143 143 теңгеге жетті, оның ішінде ынтымақты зейнетақы -95 549 теңге, базалық зейнетақы - 47 594 теңге.
2025 жылдың басынан бері базалық зейнетақы 6,5%-ға, ал ынтымақты зейнетақы 8,5%-ға ұлғайтылды. Бұл өсім инфляция деңгейінен 2%-ға жоғары болды. Сонымен қатар 2023 жылдан бастап базалық зейнетақының ең төмен және ең жоғары мөлшерін кезең-кезеңімен арттыру жүзеге асырылып жатыр.
2026 жылғы 1 қаңтардан бастап бюджеттен төленетін зейнетақы мөлшері тағы 10%-ға өсіп, базалық зейнетақының ең төменгі мөлшері 35 596 теңгеге, ал ең жоғарысы 60 005 теңгеге жетті.
Мамандардың айтуынша, базалық зейнетақы көлемі азаматтың еңбек өтілі мен міндетті зейнетақы жарналарының тұрақты аударылуына тікелей байланысты.
