«ҚазМұнайГаз» ұлттық компаниясы» АҚ басқарма төрағасы Асхат Хасенов пен CITIC Construction Co., Ltd. директорлар кеңесінің төрағасы Ян Цзяньцянь Қарашығанақ газ өңдеу зауытын салу жобасының жүзеге асырылу барысын талқылады, деп хабарлайды QazMonitor.
Кездесу барысында жобаны іске асырудың негізгі параметрлері, соның ішінде жобаның құнын бағалау, жабдықтар жиынтығы және ынтымақтастықтың басым бағыттары қаралды. Айта кетейік, 2025 жылдың соңында тараптар Қарашығанақ газ өңдеу зауыты жобасы бойынша ынтымақтастық туралы келісімге қол қойған болатын.
Тараптар жобалық құжаттаманы әзірлеу кезеңіне (FEED) көшу және оңтайлы техникалық әрі ұйымдастырушылық шешімдерді айқындау үшін алдағы іс-шаралар жоспары жөнінде уағдаласты. Қазіргі таңда ҚМГ мен CITIC Construction мамандары газ өңдеу зауытын салу аясындағы ерте құрылыс жұмыстарының параметрлерін жан-жақты пысықтап жатыр.
Сонымен қатар кездесуде CITIC Construction компаниясының Қазақстандағы өзге де газ жобаларына қатысу мүмкіндігі талқыланды.
