Конституциялық реформалар жөніндегі комиссияның үшінші отырысында Мәжіліс депутаттары бірпалаталы Парламентке көшу, партиялардың институционалдық рөлін күшейту және болашақ Құрылтайдың өкілеттіктерін арттыру мәселелерін талқылады, деп хабарлайды QazMonitor.
Отырыс барысында Мәжіліс депутаты Елнұр Бейсенбаев парламенттік реформаның Конституциялық өзгерістердің негізгі бағыты екенін атап өтті. Оның айтуынша, бірпалаталы Парламентке көшу саяси жауапкершілікті нақтылап, партиялардың рөлін күшейтеді.
«Бірпалаталы Парламент құру — ел болашағы үшін тағдыршешті әрі қажетті шешім. Бұл партиялардың институционалдық рөлін арттырып, заң шығару процесін ашық әрі түсінікті етеді», – деді Ернұр Бейсенбаев.
Депутат заң жобаларының үш оқылымнан өтуі лоббизм мен жеке мүддеге қызмет ететін ұсыныстарға тосқауыл болатынын да айтты.
Комиссия отырысында сөз алған Мәжіліс депутаты Магеррам Магеррамов «Заң мен тәртіп» қағидатын Конституцияда бекіту әділетті қоғам қалыптастырудың негізі екенін жеткізді.
«Пропорционалды жүйе арқылы құрылатын бірпалаталы Парламент партиялық-саяси пікірталастың сапасын арттырып, қоғам мен билік арасындағы диалогты күшейтеді», – деді ол.
Оның айтуынша, көппартиялы өкілдік демократиялық саяси жүйенің тұрақтылығын қамтамасыз етеді.
Ал Мәжіліс депутаты Айдос Сарым болашақ Құрылтай депутаттарының өкілеттігі айтарлықтай кеңейетінін мәлімдеді. Ол жаңа редакцияда Конституцияның 53-бабындағы тармақтар саны 13-тен 23-ке дейін ұлғаятынын атап өтті.
«Бұл өзгерістер билік тармақтары арасындағы тежеу мен теңгерім тетігін күшейтіп, мемлекеттік басқару жүйесін тұрақтандырады», – деді Айдос Сарым.
Сондай-ақ Respublica партиясы фракциясының жетекшісі Айдарбек Қожаназаров конституциялық реформаның жас буынға бағдарланғанын және экономиканы дамытуға институционалдық негіз қалыптастыратынын айтты.
Өз кезегінде «Ақ жол» демократиялық партиясының төрағасы Азат Перуашев бірпалаталы Парламент унитарлы мемлекет үшін ең оңтайлы модель екенін атап өтті.
«Қазақстан – унитарлық мемлекет. Сондықтан бірпалаталы Парламентке көшу Конституция эволюциясының логикалық жалғасы болып табылады», – деді Азат Перуашев.
Депутаттардың айтуынша, ұсынылып отырған реформалар заң шығарушы биліктің ықпалын арттырып, партиялардың саяси жауапкершілігін күшейтуге бағытталған.
