Үкімет отырысында 2026-2030 жылдарға арналған «Қазақстан балалары» бірыңғай тұжырымдамасы таныстырылды, деп хабарлайды QazMonitor.
Құжат Бала құқықтары жөніндегі уәкілмен және бейінді министрліктермен бірлесіп дайындалған және балалардың құқықтарын қорғау саласында қабылданатын шаралардың дәйектілігі мен тиімділігін арттыруға бағытталған.
«Тұжырымдама қауіпсіздік, білім беру, денсаулық сақтау, отбасы құқығы және әлеуметтік қорғау сияқты салалардағы балалардың құқықтарын қамтамасыз ететін төрт негізгі бағытты қамтиды. Тиімділікті бағалау үшін 10 индикатор, ал жүзеге асыру үшін 158 іс-шара көзделген. Қаржыландырудың жалпы көлемі 1,3 трлн теңгені құрайды», - деді ҚР оқу-ағарту министрі Жұлдыз Сүлейменова.
Құжат аясында «Заң мен тәртіп» идеологиясын кеңінен тарату, мектептерде педагог-психолог сағаттарын енгізу және балаларды «Адал азамат» рухында тәрбиелеу жоспарлануда. Сондай-ақ зорлық-зомбылықтан зардап шеккен балаларға көмек кабинеттерін ашу, психологиялық диагностиканың бірыңғай цифрлық платформасын құру және қадағалауды талап ететін балаларды тәлімгерлермен 100% қамту көзделген.
Тұжырымдамада буллингті анықтау үшін бейнебақылау камераларына жасанды интеллект технологияларын енгізу, құқыққа қайшы контентті жоймағаны үшін интернет-платформалардың жауапкершілігін күшейту сияқты шаралар да қарастырылған.
