Аталған құжат мүше және байқаушы мемлекеттердің, сондай-ақ басқа елдердің аумағында туындауы мүмкін табиғи апаттар мен төтенше жағдайларға бірлесіп әрекет ету тетігін қалыптастыруды көздейді, деп хабарлайды QazMonitor.
Келісімге сәйкес, азаматтық қорғау тетігінің негізгі функцияларына төтенше жағдайларға жедел ден қою, адам өмірі мен мүлікті құтқару, медициналық көмек көрсету, жедел байланыс орнату, сын-қатерлерді мониторингтеу және талдау, уақытша баспана ұсыну, гуманитарлық көмек көрсету, сондай-ақ апаттардың алдын алу және оларға дайындықты қамтамасыз ету кіреді.
Сонымен қатар құжатта төтенше жағдайларды басқару саласында жұмыс істейтін мамандардың кәсіби құзыретін арттыруға ерекше мән берілген. Бұл бағытта бірыңғай кәсіптік даярлау стандарттарын әзірлеу және өндірістен қол үзбей теориялық әрі практикалық оқу бағдарламаларын ұйымдастыру қарастырылған.
Келісімнің мақсаттары мен міндеттерін іске асыру үшін апаттар мен төтенше жағдайларды басқаруға жауапты Министрлер кеңесін құру, сондай-ақ Түркі мемлекеттері ұйымының Азаматтық қорғау тетігінің хатшылығын құру жоспарланып отыр.
