Бұған дейін Ұлттық қауіпсіздік комитеті медициналық бұйымдардың ауқымды жалған отандық өндіріс схемасының жолы кесілгенін хабарлаған болатын, деп хабарлайды QazMonitor.
Құқықтық статистика және арнайы есепке алу органдарының порталында іздеудің 28.01.2026 жылдан бастап жарияланғаны көрсетілген.
Атап айтқанда, OrdaMed АҚ басшылығы Қазақстанда жеке өндірісінің бар екендігі туралы жалған құжаттарды пайдалана отырып, халықтың әл-ауқаты мен денсаулығын қамтамасыз ету үшін өте қажет медициналық жабдықтың 28 түрін мемлекеттік емдеу мекемелеріне жеңілдікпен жеткізуде заңсыз преференциялар алған.
Іс жүзінде дайын жабдықтар шетелден жеткізіліп отырған. Нәтижесінде мемлекетке 4,5 млрд теңге көлемінде шығын келтірілді.
Тінту барысында OrdaMed АҚ басшылығынан 1 млрд теңгеден астам сомаға инвестициялық монеталар тәркіленді, сондай-ақ «Interdentica», «Erkin Brand» және «OrdaMed» компанияларындағы қатысу үлестеріне шектеу қойылды. Сот санкциясымен OrdaMed АҚ техникалық директоры, басқарманың бұрынғы төрағасы және өндірістік басқарма бастығы қамауға алынды. Сотқа дейінгі тергеу амалдары жүргізіліп жатыр.
