Алматы мектептерінің оқу бағдарламасына тау шаңғысын үйрету элементтерін енгізу ұсынылды. Бұл бастаманы Kazakh Tourism Development компаниясының атқарушы директоры Ержан Еркінбаев көтеріп, оны бұқаралық спортты дамыту және ішкі туризмге ұзақ мерзімді сұраныс қалыптастырудың тиімді тетігі ретінде қарастыруды ұсынды, деп хабарлайды QazMonitor.
Ол бұқаралық спортты қалыптастыру мақсатында, Оқу-ағарту министрлігімен және Алматы әкімдігімен бірлесіп, мектептегі білім беру жүйесіне тау шаңғысын үйрету элементтерін енгізуді сұрады.
«Біз бұны министрліктің бастамасы ретінде жасауды, оған әдемі атау беріп, пилоттық режимде Алматы өңірімен бірге пысықтап, жақын арада іске қосуды ұсынамыз», деді Еркінбаев Туризм және спорт министрлігінің кеңейтілген алқа мәжілісінде.
Ержан Еркінбаев әлемдік тәжірибеге сүйене отырып, мектеп бағдарламасына қысқы спорт түрлерін енгізу өзін толық ақтайтынын атап өтті.
«Австрияда мектеп бағдарламалары аясында жыл сайын 80 000-нан астам бала шаңғы тебуге тартылады. Швейцарияда бұл көрсеткіш жыл сайын 128 000 баланы құрайды. Францияда, Италияда - осы елдердің барлығында ұқсас бағдарламалар жұмыс істейді және олар әртүрлі аталады», деп қосты ол.
Оның пікірінше, мұндай тәжірибе балалардың спортқа ерте бейімделуіне ғана емес, таулы өңірлердегі туристік инфрақұрылымға тұрақты сұраныс қалыптастыруға мүмкіндік береді.
Бұл тәжірибе тауға және қысқы спорт түрлеріне деген тұрақты қызығушылықты қалыптастырып қоймай, ішкі туризмді дамытудың ұзақ мерзімді негізін қалауға мүмкіндік береді деп есептейді ол.
