2026 жылы VietJet Air әуекомпаниясы Ханой – Алматы – Прага бағыты бойынша тұрақты әуе рейсін іске қосуды жоспарлап отыр, деп хабарлайды QazMonitor. Осыған байланысты Астана мен Ханой арасында тікелей әуе қатынасын ашу, сондай-ақ Алматы – Хошимин бағыты бойынша рейсті қалпына келтіру мүмкіндігі қарастырылуда.
Бұл туралы Премьер-министрдің орынбасары – ұлттық экономика министрі Серік Жұманғарин Вьетнам Социалистік Республикасы Премьер-министрінің тұрақты орынбасары Нгуен Хоа Бинмен өткен кездесуде мәлімдеді.
Кездесу барысында тараптар сауда-экономикалық және ғылыми-техникалық ынтымақтастық жөніндегі Үкіметаралық комиссияның маңызын атап өтті. Комиссияның кезекті отырысын биылғы маусым-шілде айларында өткізу жоспарланып отыр. Сонымен қатар 2026 жылы Қазақстан – Вьетнам іскерлік кеңесін құру туралы меморандумға қол қою көзделген.
Нгуен Хоа Бин Қазақстан мен Вьетнам арасындағы дәстүрлі достық қарым-қатынасты атап өтіп, аймақаралық өзара іс-қимылды қоса алғанда, екіжақты ынтымақтастықты одан әрі кеңейтуге дайын екенін білдірді. Ол «Орта дәлізді» дамыту бастамаларын қолдап, Хошимин қаласында қаржы орталығын құру жоспарларына байланысты «Астана» халықаралық қаржы орталығының тәжірибесін зерделеуге қызығушылық танытты.
