2026 жылғы 1 наурыздан бастап FlyArystan әуе компаниясының жолаушылары бұрынғы 5 келі орнына салмағы 7 келіге дейінгі қолжүгін өзімен бірге алып жүре алады, деп хабарлайды QazMonitor. Қолжүк өлшемдері өзгеріссіз қалады.
Бұл шешім жолаушылар сұранысының құрылымын, операциялық процестерді және әуе тасымалы нарығындағы тәжірибені қамтыған кешенді бизнес-талдау нәтижесінде қабылданған. Жаңа ереже билет сатып алу күніне қарамастан, 1 наурыздан бастап орындалатын барлық рейстерге қолданылады.
Ал 2026 жылғы 28 ақпанға дейін (қоса алғанда) жүзеге асырылатын рейстерде бұрынғы талап сақталып, бір жолаушыға 5 келіге дейінгі қолжүк нормасы қолданылады. Сондай-ақ one-piece concept қағидаты өзгеріссіз қалып, жолаушы өзімен бірге белгіленген салмақ пен өлшемге сай келетін бір ғана қолжүк алып жүре алады.
Компанияның 2024-2025 жылдардағы деректеріне сәйкес, жолаушыларының шамамен төрттен үш бөлігі сапарға тек ең аз көлемдегі қолжүкпен шыққан.
