Президент Қасым-Жомарт Тоқаев Үкіметтің кеңейтілген отырысында сөйлеген сөзінде жаңа Конституция жобасына тұрғын үйден мәжбүрлеп шығаруға сот шешімінсіз жол бермейтін норма енгізуді ұсынды, деп хабарлайды QazMonitor.
Мемлекет басшысы ұсынылып отырған конституциялық өзгерістердің негізгі мақсаты – адам құқықтары мен бостандықтарын қорғау тетіктерін нақты әрі жүйелі түрде бекіту екенін атап өтті. Оның айтуынша, бұл бағытта декларативті емес, нақты жұмыс істейтін құқықтық жүйе қалыптастырылуы тиіс.
Президенттің сөзінше, Конституция жобасында бірқатар маңызды жаңашылдықтар қарастырылған. Атап айтқанда, адвокаттардың ұсынысымен адвокатура туралы жеке бап енгізілген, ал білім беру жүйесіне басымдық беру арқылы мемлекеттің зайырлы сипаты нақтыланған. Сонымен қатар, «неке – еркек пен әйелдің ерікті және теңқұқылы одағы» деген тұжырым дәстүрлі құндылықтарды сақтау мақсатында Конституция деңгейінде бекітілмек.
Осы өзгерістермен қатар Президент қолданыстағы Конституциядағы тұрғын үйге қол сұғылмаушылық туралы норманы кеңейтуді ұсынды.
«Түзетулердің ішіне тағы бір аса қажетті норманы енгізу керек. Қазіргі Конституцияда «Тұрғын үйге қол сұғуға болмайды. Сот шешімінсіз тұрғын үйден айыруға жол берілмейді» деген ереже бар. Осы ережені «тұрғын үйден мәжбүрлеп шығаруға» да сот шешімінсіз жол берілмейді деп толықтырған жөн», деді Тоқаев.
Мемлекет басшысы бұл норманы әлеуметтік маңызы жоғары және жаңа Конституцияның мазмұнына толық сай келетін ереже деп атап, Конституциялық комиссия мүшелеріне ұсынысты қарауды тапсырды.
