Әлеуметтік желілерде тараған «әскерден қалдыру» немесе «ақ билет» алып беру туралы жарнамаларға қатысты Қазақстан Республикасының Қорғаныс министрлігі оның заңсыз екенін мәлімдеді, деп хабарлайды QazMonitor. Ведомствоның түсіндіруінше, мерзімді әскери қызметке шақыруды кейінге қалдыру немесе одан босату туралы шешімді тек шақыру комиссиясы заң аясында қабылдайды.
Министрлік медициналық құжаттарды қолдан жасау, жалған диагноз рәсімдеу немесе әскери қызметтен жалтарудың өзге де жолдары қылмыстық жауапкершілікке әкелетінін ескертті. Азаматтарға «мәселені шешіп береміз» деп уәде беретін делдалдарға сенбеу ұсынылды.
Әскерге шақыру 18–27 жас аралығындағы ер азаматтарға қатысты жылына екі рет — наурыз–маусым және қыркүйек–желтоқсан айларында жүргізіледі. Заңды негіздер болған жағдайда ғана кейінге қалдыру немесе босату мүмкіндігі қарастырылады.
Сонымен қатар министрлік мерзімді әскери қызмет өткергендерге білім гранттары, жатақханаға басымдық және несиелік каникул секілді жеңілдіктер берілетінін атап өтті.
