2024 жылға арналған тарифтік сметаларды тексеруден кейін Абай облысында судың бағасы төмендетілді, деп хабарлайды QazMonitor.
Тексеруді ҚР Ұлттық экономика министрлігі табиғи монополияларды реттеу комитетінің облыстық департаменті жүргізді. Талдау нәтижесінде «Семей Водоканал» бекітілген сметаны толық орындамағаны анықталды. Орындалмаған сома шамамен 479 млн теңгені құрады.
Су беру қызметі бойынша орындалмаған қаржы 375,2 млн теңге болды. Сарқынды суларды бұру бойынша 103,7 млн теңге анықталды. Жалпы сома Ұлттық Банктің базалық мөлшерлемесі есепке алынғанда 478,9 млн теңгеге жетті.
Осыған байланысты 2026 жылғы 1 сәуірден бастап бір жыл мерзімге уақытша өтемдік тариф енгізіліп отыр.
Су беру тарифі 11,78 пайызға төмендеп, баға 198,90 теңгеден 175,48 теңгеге түсті.
Сарқынды суларды бұру тарифі 7,08 пайызға азайып, бағасы 137,40 теңгеден 127,67 теңгеге дейін төмендеді.
Бұл шаралар тұтынушылардың қаражатын қайтаруға мүмкіндік береді.
Аталған дерек бойынша кәсіпорынға қатысты екі әкімшілік іс қозғалып, нәтижесінде 13 840 000 теңге айыппұл салынды.
