Қазақстандық мәнерлеп сырғанаушы Михаил Шайдоров қытайлық CGTN Sports Scene бағдарламасына берген сұхбатында өзінің жеңісі өзі үшін де күтпеген болғанын айтты, деп хабарлайды QazMonitor. Сұхбат арнаның ресми YouTube парақшасында жарияланған.
Спортшының айтуынша, жарыс барысында ол қарсыластарының ұпайын көре алмаған.
«Мен таблоны көре алмадым, бағаларды да білмедім. Барлығында теледидар болды, бірақ отырған жерімнен әр спортшының қанша ұпай жинағанын көре алмадым. Сондықтан кестеде елімнің көк туы ең жоғары тұрғанын көрген сайын қатты таңғалдым», деді чемпион.
Шайдоров барлық жарыстардың оңай болмағанын жасырмады. Алайда Италияға келген сәтте өзін біршама жеңіл сезінгенін айтты.
«Еркін бағдарлама алдында бес төрттік секіру жасау — үлкен тәуекел екені туралы көптеген пікірлер мен жазбалар болды. Бір жағынан, бұл маған қысым жасады, екінші жағынан — жігер берді. Себебі мен шынымен тәуекелге бардым. Қалай айтылғандай, тәуекел етпеген — жеңіске жетпейді», деді ол.
13 ақпанда 21 жастағы қазақстандық спортшы ерлер арасындағы жекелей мәнерлеп сырғанаудан Олимпиада чемпионы атанды. Қысқа бағдарламадан кейін Шайдоров бесінші орында тұрған еді. Дегенмен жарысты 291,58 ұпаймен аяқтап, жоғары нәтиже көрсетті.
«Біз мәнерлеп сырғанауда АҚШ, Жапония, Корея немесе Италия сияқты әлемдегі ең мықты елдердің біріне айналған кезде — мен мұны өзім үшін де, бүкіл ел үшін де шынайы басты жеңіс дер едім. Ал әзірге бұл — мен үшін және елім үшін ең маңызды жеңіс. Бұл жеңіс жаңа мүмкіндіктерге жол ашады деп үміттенемін», — деді Шайдоров қытайлық бағдарлама журналистеріне берген сұхбатында.
