Жоба аясында ұзындығы 5,3 шақырым болатын ұйымдастырылған туристік соқпақ салу көзделген, деп хабарлайды QazMonitor. Құрылысты биылғы желтоқсанда аяқтау жоспарланып отыр.
Алматыны дамытудың маңызды бағыттарының бірі — қаланың көлік қаңқасын қалыптастыру. Осы мақсатқа жергілікті бюджеттен қосымша 19,7 млрд теңге қарастырылған.
2026 жылы Төле би көшесін ұзарту жобасын аяқтауға 13,6 млрд теңге бөлу жоспарланған. Сондай-ақ Саин және Оңғарсынова көшелерін ұзарту жұмыстарын тәмамдауға 1,6 млрд теңге бағытталады.
Алатау ауданындағы Ғажайып және Алғабас шағынаудандарында жаңадан салынған мектептерге баратын жол құрылысына қосымша 1,3 млрд теңге бөлінеді. Бұл оқушылардың жаңа оқу жылы басталғанға дейін, яғни тамыз айында мектепке қауіпсіз жетуін қамтамасыз етпек.
Қала көшелеріндегі қауіпсіздікті арттыру және қоғамдық көлік қозғалысын реттеу мақсатында «Көкжиек», «Саялы-2» және «Жас Қанат» шағынаудандарында үш аялдап-бұрылу алаңын салуға 500 млн теңгеден астам қаржы қарастырылған.
2026 жылға арналған бюджетті бекіту кезінде абаттандыру жұмыстарына ерекше назар аударылған. Бюджетті нақтылау аясында бұл салаға бөлінетін қаржы көлемі 5,2%-ға ұлғаймақ. Қаражат қалалық инфрақұрылымды жақсартуға, қоғамдық кеңістіктердің сапасын арттыруға және тұрғындарға қолайлы орта қалыптастыруға бағытталады.
Осыған байланысты қаладағы 9 көшеде аумақтарды жаңарту және кешенді абаттандыру жұмыстары жүргізіледі.
Сонымен қатар, қаланың алты ауданындағы 159 ғимаратқа сәулеттік-көркем жарықтандыру орнатуға қосымша 5 млрд теңге бөлу жоспарланған. Оның ішінде көпқабатты тұрғын үйлер, әлеуметтік және мәдени нысандар бар.
Бұдан бөлек, биыл тамыз айында Наталия Сац атындағы Балалар мен жасөспірімдер театры ғимаратын реконструкциялау және қосымша құрылыс жұмыстарын аяқтау көзделіп отыр. Жобаны толық аяқтауға 3,5 млрд теңге бөлінген.
