Қаңтар айында қазақстандық жұмыс берушілер ең жоғары жалақыны бұрғылау жөніндегі супервайзерлерге, өндіруші өнеркәсіптегі учаске бастықтарына және бас геологтарға ұсынды, деп хабарлайды QazMonitor.
Супервайзерлерге (орта есеппен 991 мың теңгеден бастап), өндіруші өнеркәсіптегі учаске бастықтарына (876 мың теңгеден бастап) және бас геологтарға (803 мың теңгеден бастап) ұсынылған.
Сонымен қатар жұмыс іздеушілер тарапынан жалақы бойынша ең жоғары күтімдер жаңа өнімдерді әзірлеу жөніндегі жоба жетекшілерінің (1,3 млн теңге), жеке сектордағы коммерциялық директорлардың (1,2 млн теңге) және іске қосу мен сынақтар жөніндегі инженерлердің (орта есеппен 865 мың теңге) түйіндемелерінде байқалды.
Еңбек және халықты әлеуметтік қорғау министрлігі мәліметінше, қаңтардан бастап Электрондық еңбек биржасында 102,7 мың бос жұмыс орны жарияланып, 162,4 мың түйіндеме орналастырылған. Барлық ұсыныстардың 80%-дан астамы білікті кадрларға бағытталған.
Барлық бос орындардың ішінде білім беру саласы көш бастады – 33 мыңнан астам хабарландыру (жалпы санның үштен біріне жуығы). Одан кейін өзге де қызмет түрлері – 11,4 мың (11,1%) және денсаулық сақтау мен әлеуметтік қызмет көрсету – 9,7 мың (9,5%) орналасқан. Сондай-ақ кадрларға жоғары қажеттілік мемлекеттік басқаруда (7 мың) және өңдеу өнеркәсібінде (6,9 мың) тіркелді.
Бос орындардың ең көп саны Астана қаласында (8,9 мың), Түркістан (7,3 мың) және Қарағанды (7,1 мың) облыстарында, сондай-ақ Алматы қаласында (6,9 мың) қолжетімді. Ал жұмыс іздеушілердің көбі Түркістан облысынан (23 мың), Атырау (12,2 мың), Маңғыстау (11,3 мың) және Қызылорда (10,9 мың) облыстарынан болды.
