ҚР Денсаулық сақтау министрлігі екпе алмаған балалардың ата-аналарының жауапкершілігіне қатысты нұсқақаларды қарастырып жатыр, деп хабарлайды QazMonitor Kazinform агенттігіне сілтеме жасап.
Орталық коммуникациялар қызметінде өткен брифингте Санитариялық-эпидемиологиялық бақылау комитетінің төрайымы Сархат Бейсенова бүгінгі күні екпе алмаған балалардың ата-аналарынан материалдық және моральдық зиянды өндіріп алу механизмі заңнамалық деңгейде бекітілмегенін мәлімдеді.
Оның айтуынша, мектептер мен балабақшалар сияқты ұйымдасқан балалар ұжымдарында қызылша тіркелген жағдайда, аурудың таралуын болдырмау үшін екпе алмаған балалар уақытша оқшауланады. Сонымен қатар, карантиндік шектеулерге, емделуге және жұмыс істейтін ата-аналардың табысынан айырылуына байланысты шығындарды өтеу мәселесі әлі реттелмеген.
«Бүгінгі таңда екпе алмаған балалардың ата-аналарынан тікелей өтемақы өндіріп алу мәселесі маңызды талқылауды және тиісті нормативтік-құқықтық құжаттарды әзірлеуді талап етеді. Қазірше түпкілікті шешім қабылданған жоқ», деді Сархат Бейсенова.
Сондай-ақ ол Қазақстанда қызылшамен ауыру жағдайларының негізінен екпе алмаған балалар арасында тіркелетінін атап өтті, олардың үлесі 80%-ға жетеді. Вакцинация дер кезінде жасалса, инфекция жұқтыру қаупі айтарлықтай төмендейді.
Ұжымдық иммунитетті қалыптастыру үшін нысаналы жас топтарындағы (1 жас және 6 жас) балалардың кемінде 95%-ын екпемен қамту қажет. Иммунизацияның мұндай деңгейі вирустың ауырған адамдардан екпе алмаған балаларға берілуін тоқтатуға мүмкіндік береді.
