2026 жылғы 2 наурыздан бастап «Отбасы банк» тұрғын үйді кезекте тұрған азаматтарға тек түгендеуден өткеннен кейін ғана үлестіреді, деп хабарлайды QazMonitor Отбасы банкінің баспасөз қызметіне сілтеме жасап. Енді инвентаризация баспана бөлу алдындағы алғашқы әрі міндетті қадам болады.
Банк ұлттық даму институты мәртебесінде әкімдіктерден 13 393 пәтер қабылдаған. Оның 8 846-сы – жалдамалы, 4 547-сі – несиелік тұрғын үй. Қазіргі уақытқа дейін 4 216 қазақстандық отбасы баспаналы болды.
Түгендеу – кезекте тұрған азаматтардың деректерін тексеру және нақтылау рәсімі. Ол азаматтың мәртебесін, отбасы құрамын және тұрғын үйінің бар-жоғын анықтауға мүмкіндік береді. Бұған дейін баспана түгендеуден өтпеген азаматтарға да уақытша үлестірілген. Алайда тексеру барысында кейбір азаматтардың тұрғын үйі бар екені немесе отбасы құрамының өзгергені анықталып, пәтерді қайта бөлуге тура келген. Бұл процестің созылуына әсер еткен.
Жаңа тәртіпке сәйкес, түгендеуден өтпеген азаматтар кезектен шығарылмайды, бірақ тұрғын үй бөлуге қатыса алмайды. Сондай-ақ оларға жалдамалы баспана да, 2% және 5% мөлшерлемесімен жеңілдетілген несие де ұсынылмайды.
Қазіргі таңда кезекте тұрған 257 мың адам түгендеуден өткен.
