Биыл халықаралық олимпиадалар мен ғылыми байқауларға 1 720 қазақстандық оқушы қатысып, 1 006 медаль иеленді. Робототехника, химия және физика пәндері бойынша ұлттық құрама командалар әлемдік деңгейде жоғары нәтиже көрсетіп, көшбасшылар қатарынан көрінді, деп хабарлайды QazMonitor.
Инфрақұрылымды жаңғыртуда Келешек мектептері ұлттық жобасы маңызды рөл атқарды. Жоба аясында 460 мың орындық 217 жаңа мектеп пайдалануға берілді. Соның нәтижесінде 43 үш ауысымды және 8 апаттық мектеп мәселесі толық шешімін тапты. Бұдан бөлек, реновация бағдарламасы бойынша 245 мектеп жаңартылып, олардың басым бөлігі ауылдық жерлерде орналасқан.
Жалпы, 2020 жылдан бері 1,1 млн оқушыға арналған 1242 жаңа мектеп салынды. Бұл шаралар үш ауысымды мектептер санын төрт есеге қысқартып, білім беру сапасын арттыруға және өңірлер арасындағы алшақтықты азайтуға мүмкіндік берді.
