Қаржы нарығын реттеу және дамыту агенттігі міндетті автосақтандыру бойынша сақтандыру төлеміне өтінішті ресімдеудің оңайлатылған тәртібі – Еурохаттама туралы еске салды, деп хабарлайды QazMonitor.
Еурохаттама жол-көлік оқиғасына (ЖКО) қатысушыларға жол полициясы қызметкерлерін шақырмай және сотқа жүгінбей, оқиға орнында сақтандыру ұйымына тікелей сақтандыру төлеміне өтініш жіберуге мүмкіндік береді.
ЖКО кезінде сақтандыру жағдайларын Еурохаттама шеңберінде реттеу үшін бірнеше шарт сақталуы тиіс: оқиғаға екі көлік қатысуы қажет, екі жүргізушіде де қолданыстағы сақтандыру полисі болуы керек, залал сомасы 100 айлық есептік көрсеткіштен аспауы тиіс және қатысушылар арасында кінәлі тарапқа қатысты келіспеушілік болмауы қажет. Сонымен қатар, жол-көлік оқиғасы салдарынан ешкімнің өмірі мен денсаулығына, сондай-ақ үшінші тұлғалардың мүлкіне зиян келтірілмеуі міндетті шарт болып табылады.
Еурохаттаманы рәсімдеу үшін ЖКО-ға қатысушылардың екеуі де «Europrotocol», «DTP.kz» немесе «Halyk Kazakhstan» мобильді қосымшаларының бірін жүктеп алуы қажет. Сондай-ақ сақтандыру ұйымдарының ресми интернет-ресурстары арқылы да сақтандыру төлеміне өтініш беруге болады.
Рәсімдеу бірнеше кезеңнен тұрады: пайдаланушы сәйкестендіруден өтеді, декларацияларды толтырады, оқиға орнынан фото және бейнематериалдарды тіркейді. Осыдан кейін өтініш автоматты түрде сақтандыру ұйымына жіберіледі. Қатысушылар сақтандырушы декларацияны қабылдағаны туралы хабарлама алғанға дейін оқиға орнынан кетпеуі тиіс. Хабарлама алынғаннан кейін жол-көлік оқиғасы орнынан кетуге болады. Бұл ретте жол полициясын шақыру және сотқа жүгіну талап етілмейді.
2026 жылғы 1 қаңтардағы жағдай бойынша «Еурохаттама» іске қосылған сәттен бастап жалпы сомасы 4,9 млрд теңгеге жуық 25 мыңға тарта сақтандыру оқиғасы рәсімделген.
