Қазақстанның барлық мектептерінде 2026 жылғы 2 наурыздан бастап ерекше педагогикалық назарды қажет ететін кәмелетке толмағандарға жеке педагогикалық сүйемелдеу енгізілді, деп хабарлайды QazMonitor.
Жаңа тәртіп тәуекел тобындағы оқушыларды ерте анықтап, оларға білім беру ұйымдарында нысаналы психологиялық-педагогикалық көмек көрсету және құқық бұзушылықтардың алдын алуды көздейді.
Қазақстанда ерекше назарды қажет ететін балалар санатына оқуда қиындықтары бар, сабақты себепсіз жүйелі түрде қалдыратын, қоғамға жат мінез-құлық танытатын, зорлық-зомбылыққа ұшыраған немесе өмірлік қиын жағдайға тап болған оқушылар жатқызылады.
Оқу-ағарту министрлігі мәліметінше, оқушыға педагогикалық сүйемелдеу білім беру ұйымындағы профилактика кеңесінің шешімімен тағайындалады. Әр бала үшін нақты қолдау шаралары мен жауапты мамандар бекітілетін жеке жұмыс жоспары әзірленеді.
Сүйемелдеу аясында педагогтар мен психологтар баламен жеке жұмыс істеп, ата-аналармен және қажет болған жағдайда әлеуметтік қызметтермен тығыз байланыс орнатады. Қазіргі уақытта ведомство аталған сүйемелдеу қағидаларын бекіту бойынша жүйелі жұмыстарды жалғастырып жатыр.
