Қарағанды облысының тұрғындарына коммуналдық қызметтер үшін 3,1 млрд теңгеден астам қаражат қайтарылады, деп хабарлайды QazMonitor. Бұл қаражатты табиғи монополия саласындағы 18 кәсіпорын тариф арқылы алғанымен, жоспарланған жұмыстарға толық жұмсамаған.
Қарағанды облысы бойынша Табиғи монополияларды реттеу комитеті департаменті мамандары табиғи монополия субъектілерінен түскен 200 есепті зерделеген. Аталған есептер 73 кәсіпорынның тарифтік сметаларды орындауы мен инвестициялық бағдарламаларды жүзеге асыруы туралы мәліметтерді қамтыған.
Талдау нәтижесінде 18 табиғи монополия субъектісі бекітілген тарифтік сметаларда қарастырылған бірқатар жұмыстар мен шығындарды толық орындамағаны анықталды.
Заңнамаға сәйкес, мұндай жағдайда тұтынушыларға қаражатты қайтару үшін өтемдік тариф енгізіледі. Осы тетік арқылы Қарағанды облысының тұрғындарына Ұлттық банктің қайта қаржыландыру мөлшерлемесін ескере отырып, 3,1 млрд теңгеден астам қаражат қайтарылады.
Өтемдік тарифтер бір жыл ішінде — 2026 жылғы 1 қаңтардан 2027 жылғы 1 наурызға дейін қолданылады.
Қайтарылатын қаражат қызмет түрлері бойынша мынадай бағыттарға бөлінеді:
сумен жабдықтау және су бұру қызметтері – 2,27 млрд теңге;
электр энергиясын жеткізу қызметтері – 669,6 млн теңге;
жылумен жабдықтау қызметтері – 107,7 млн теңге;
кірме жолдар қызметтері – 3,7 млн теңге;
газбен жабдықтау қызметтері – 55,6 млн теңге.
Бұл шара тариф арқылы жиналған, бірақ жоспарланған бағыттарға жұмсалмаған қаражатты тұрғындарға қайтаруға мүмкіндік береді.
