Қазақстан Республикасы Үкіметі Салық кодексінің нормаларын енгізу барысын пысықтады. Жобалық кеңсе отырыстарында жаңа кодекстің талаптарын іске асыруға қатысты 60 мәселе қаралған, деп хабарлайды QazMonitor.
Үкіметтің мәліметінше, денсаулық сақтау саласында дәрі-дәрмектер мен медициналық бұйымдарды импорттау кезінде қосылған құн салығын (ҚҚС) қолдану мәселесі қарастырылған. Сонымен қатар орфандық және әлеуметтік маңызы бар дәрілерді ҚҚС-тан босатуға қатысты заңға тәуелді актілерге өзгерістер енгізу жұмыстары аяқталуға жақын.
Қазақстан Республикасы Денсаулық сақтау министрлігі 13 ақпанда ҚҚС-сыз сатылатын дәрі-дәрмектер мен медициналық бұйымдарға шекті бағаларды белгілеу туралы бұйрық қабылдады.
Сондай-ақ Өнеркәсіп және құрылыс министрлігі, Энергетика министрлігі, Қаржы министрлігі, Табиғи монополияларды реттеу комитеті және Самұрық-Қазына қоры оңайлатылған декларация негізіндегі арнаулы салық режимін қолданатын кәсіпкерлерден тауарлар, жұмыстар және қызметтер сатып алу қағидаларына өзгерістерді талқылап жатыр.
Бұл өзгерістер квазимемлекеттік компаниялардың шығындарын ұлғайтпай, салық заңнамасын сақтау, өндірістік процестердің тұрақтылығын қамтамасыз ету және бәсекелестік ортаны қолдау мақсатында енгізіледі. Салық кодексінің негізгі қағидаттарына сәйкес қажетті өзгерістердің бірыңғай негізін Ұлттық экономика министрлігі әзірлейді.
Үкімет мәліметінше, «таза парақтан» салық әкімшілендіру, салық режимдерін өзгерту, қаржы секторын реттеу және салықтық әкімшілендірудің ақпараттық жүйелеріне қатысты бірқатар мәселелер жедел тәртіпте шешілген.
