Алматыны көгалдандыру жұмыстары биыл да жалғасып, жасыл аймақтардың көлемі арта түспек, деп хабарлайды QazMonitor. Егер 2025 жылы қалада шамамен 370 мың бұта мен 5 100-ден астам ірі ағаш егілген болса, 2026 жылы бұл көрсеткіш айтарлықтай көбейеді.
Биыл қала аумағында 500 мың бұта және 7 200 ірі ағаш отырғызу жоспарланған. Ірі ағаштар екі кезеңмен — көктем мен күз мезгілінде егіледі.
Сонымен қатар кесілген ағаштардың орнына жаңа көшеттер отырғызу жұмыстары да қарастырылған. Осы мақсатта шамамен 40 мыңға жуық ағаш егу көзделіп отыр.
Ірі көлемді ағаш отырғызу жобасы 2025 жылы басталған. Қазір бұл бастама жалғасып, көгалдандыру жұмыстары кезең-кезеңімен жүзеге асырылып жатыр.
Осы көктемде жоспарланған 7 200 ірі ағаштың 3 744-і егіліп үлгерді. Қалған ағаштар қалаға жеткізіліп, оларды отырғызуға дайындық жүргізілуде. Ауа райы қолайлы болған кезде егу жұмыстары жалғасады.
Жасыл желектер негізінен қаланың магистральды көшелері мен қоғамдық кеңістіктерінде отырғызылмақ. Бұл бастама Алматыны тұрғындар үшін жайлы әрі экологиялық тұрғыдан қолайлы қалаға айналдыруға бағытталған.
