Қазақстанның авиациялық әкімшілігі Көлік министрлігінің қолдауымен әуежайларда жолаушыларға көрсетілетін қызмет сапасын бағалауға арналған Best Airport Service жобасының 2025 жылғы қорытындысын жариялады, деп хабарлайды QazMonitor.
Жоба әуежайларда қызмет көрсету сапасын жақсартуға, қызмет көрсету стандарттарын біріздендіруге және жолаушыларға бағытталған қызмет мәдениетін дамытуға бағытталған.
Best Airport Service – жолаушылардың тікелей кері байланысына негізделген қызмет сапасын тәуелсіз бағалау бағдарламасы. Жоба аясында жолаушылар әуежай терминалдарындағы QR-кодты сканерлеп, қызмет көрсету сапасы туралы пікір қалдыра алады. Сонымен қатар әуежай қызметкерлеріне арналған арнайы оқу семинарлары өткізіледі.
2025 жылы жоба Ақтөбе, Қостанай және Орал халықаралық әуежайларында іске қосылды. Жыл қорытындысы бойынша аталған әуежайларда жолаушыларға қызмет көрсету сапасының жақсарғаны байқалды. Бұл қабылданған шаралардың тиімділігін және қызметкерлердің белсенді жұмысын көрсетеді.
Бағалау нәтижесінде жолаушыларға қызмет көрсету, тексеру, шекаралық және кеден қызметтерінде жұмыс істейтін 32 қызметкер алғыс хатпен марапатталды.
Сондай-ақ Air Astana, SCAT Airlines, Pegasus Airlines, Turkish Airlines және VietJet Qazaqstan әуе компанияларының қолдауымен 13 қызметкерге ішкі және халықаралық рейстерге әуе билеттері табысталды.
Жоба нәтижелері жолаушылардың тікелей кері байланысы қызмет сапасын арттыруға, қызметкерлердің жауапкершілігін күшейтуге және өңірлік әуежайлардың жұмысын жақсартуға ықпал ететінін көрсетті.
Сонымен қатар Best Airport Service жобасы Қазақстан әуежайларының бәсекеге қабілеттілігін арттырып, жолаушылар сенімін нығайтуға және халықаралық стандарттарға сай қызмет көрсету жүйесін дамытуға мүмкіндік береді.
Жоба 2026 жылы да жалғасып, еліміздің басқа да әуежайларын қамтиды. Кез келген жолаушы терминалдағы QR-кодты сканерлеу арқылы қызмет көрсету сапасын бағалай алады.
