Маңғыстау облысында Қазақстан мен Италияның ірі энергетикалық жобасы жүзеге асырылып жатыр. Қуаты 247 МВт болатын гибридті станса аймақтағы мұнай алпауыттарын үздіксіз энергиямен қамтамасыз етеді деп жоспарланған, деп хабарлайды QazMonitor.
Қазақстанның энергетикалық жүйесіндегі трансформация Жаңаөзен қаласындағы бірегей жобамен жалғасып жатыр. Энергетика министрі Ерлан Ақкенженов пен Италия елшісі Антонелло Де Риудың кездесуі барысында белгілі болғандай, италиялық Eni компаниясымен бірлесіп салынып жатқан гибридті электр стансасы биылғы жылдың басты жобаларының біріне айналмақ.
Бұл нысанның әлемдік тәжірибедегі сиректігі — оның күн, жел және газ энергиясын бір интеграцияланған жүйеде біріктіруінде. Мұндай тәсіл энергия өндірудің тұрақтылығын кепілдендіреді: күн болмағанда жел, жел басылғанда газ турбиналары іске қосылады.
2025 жылы қыркүйекте стансаның алғашқы кезеңінде 80 мың күн панелі орнатылып, таза энергия бере бастады. Биыл газ және жел қондырғыларын толық қолданысқа беру жоспарланған. Станса толық қуатына көшкенде 247 МВт энергия өндіреді.
Станса ең алдымен Маңғыстау облысының өндірістік қауіпсіздігіне бағытталған. Өндірілген электр энергиясы аймақтағы «Өзенмұнайгаз» АҚ өндірістік кешендері мен Қазақ газ өңдеу зауыты (ҚазГӨЗ) стратегиялық нысандарына бағытталады.
Сонымен қатар кездесуде тек жасыл энергия ғана емес, дәстүрлі сектор да талқыланды. Ansaldo Energia компаниясы Алматыдағы ЖЭО-3 нысанына жаңа газ турбиналарын жеткізсе, Maire Tecnimont консорциумы мұнай-газ химиясы саласындағы «Полиэтилен» жобасының құрылыс-монтаж жұмыстарын бастап кетті.
