Қазақстанда трансұлттық есірткі схемасы әшкереленіп, 40 адам ұсталды, деп хабарлайды QazMonitor ҚР ІІМ-ге сілтеме жасап.
Министрлік шет мемлекеттердің құқық қорғау органдарымен бірлесіп жүргізген ауқымды арнайы операция барысында адамдарды есірткі бизнесіне тартудың трансұлттық схемасын жойған. Тергеу кезінде ұйымдастырушылар шетелде отырып, интернет-ресурстар арқылы «жалақысы жоғары жұмыс» туралы жарнама таратқан.
Заңды жұмыс екеніне сендіріп, азаматтарды заңсыз есірткі айналымына тартқан. Олар орындаушыларға арнайы колл-орталықтар арқылы нұсқау беріп отырған.
Арнайы операция кезінде Қазақстанның 11 өңірінде 40 азамат ұсталып, есірткі таратуға қатысы бар 11 адам қамалды. Сонымен қатар тағы 9 адам есірткі тұтынғаны үшін жауапқа тартылды.
