Қазақстанда мектеп оқулықтары жаңа Конституцияға сәйкес қайта жазылатын болады. Бұл туралы бүгін Үкіметтің отырысында Оқу-ағарту министрі Жұлдыз Сүлейменова мәлімдеді, деп хабарлайды QazMonitor.
Оның айтуынша, бүгінде мектептерде қолданылып жүрген оқулықтар 2018-2019 жылдары басып шығарылған және содан бері мазмұндық тұрғыда жаңартылмаған.
«Сондықтан оқулықтардың мазмұны елде қабылданған жаңа конституциялық өзгерістерге сәйкес қайта қаралып, заманауи талаптарға сай жаңартылады», деді ол.
Министр биыл 3, 4, 7, 8 және 9-сыныптарға арналған оқулықтар жаңартылатынын айтты. 2028 жылы 2 және 6-сыныптарға арналған жаңа оқулықтарды шығару жоспарланып отыр.
Мұндай кешенді тәсіл оқушылардың сапалы дайындығын қамтамасыз етуге, олардың аналитикалық және ғылыми ойлау қабілетін дамытуға, сондай-ақ заманауи экономикада сұранысқа ие құзыреттерді қалыптастыруға мүмкіндік береді деп есептейді министр.
Сонымен қатар негізгі басымдық білім берудің бастауыш буынын нығайтуға бағытталады, өйткені дәл осы кезеңде баланың базалық білімі, дағдылары мен құндылықтары қалыптасады.
«Оқу бағдарламаларының мазмұны ғана емес, оқулықтардың сапасы да қайта қаралады, сонымен қатар жыл сайын бірінші сынып оқушылары негізгі пәндер бойынша жұмыс дәптерлерімен қамтамасыз етіледі. Мұндай тәсіл бастауыш мектептің берік іргетасы оқушылардың барлық кейінгі оқу деңгейлерінде табысты дамуының негізіне айналатын, сапаға бағдарланған неғұрлым тұрақты әрі заманауи білім беру жүйесін құруға мүмкіндік береді», деп түсіндірді Сүлейменова.
Сондай-ақ 5-тен 9-сыныпқа дейінгі буында іргелі ғылымдарды оқытуға баса назар аударылады, сондай-ақ 8-9 сыныптарда «Қазақстан географиясы» пәнін аптасына 2 сағаттан оқытуды қайта жандандыру мәселесі қарастырылып жатқаны белгілі болды.
