Қазақстанда автожол саласын цифрландыру және инфрақұрылымды жаңғырту аясында 5G технологиялары мен заманауи шешімдер енгізіледі. Бұл бастамалар Көлік министрлігі бекіткен 2026–2028 жылдарға арналған даму басымдықтары шеңберінде жүзеге асады, деп хабарлайды QazMonitor.
Құжатқа сәйкес, елдегі автожол желісін сапалық тұрғыда жаңарту, транзиттік әлеуетті арттыру және жол қозғалысының тиімділігін жақсарту көзделген. Соның ішінде негізгі бағыттардың бірі – жол инфрақұрылымын цифрлық жүйелермен интеграциялау.
Атап айтқанда, басты автожолдар бойында талшықты-оптикалық байланыс желілері дамытылып, 5G технологиялары енгізіледі. Бұл интеллектуалды көлік жүйелерін қалыптастыруға, жол қозғалысын нақты уақыт режимінде басқаруға және қауіпсіздікті арттыруға мүмкіндік береді.
Сонымен қатар, жол жабыны түрлерін таңдау тәсілдері қайта қаралады. Халықаралық және жүктемесі жоғары бағыттарда цементбетон жабындары кеңінен қолданылса, шағын елді мекендерге апаратын жолдарда қиыршық тас пен шағал жабындарына басымдық беріледі.
Транзиттік дәліздерді дамыту да басты назарда. Ірі жобалар қатарында «Бейнеу – Сексеуіл», «Қызылорда – Сексеуіл», «Сексеуіл – Ұлғайсын» және «Жаңаөзен – Кендірлі – Темірбаба» бағыттары бар. Сондай-ақ 2028 жылға дейін республикалық маңызы бар 10 мың шақырым жолды жөндеу жоспарланып отыр.
Бұдан бөлек, ұлттық автожол операторының қызметін дамыту, қаржылық тұрақтылығын арттыру және жол активтерін басқарудың заманауи модельдерін енгізу көзделген.
Саланың технологиялық жаңғыртылуы аясында полимермен модификацияланған битумдарды қолдану, жобаларды ғылыми-техникалық сүйемелдеумен іске асыру шаралары қарастырылған. Бұл бағытта «ҚазжолҒЗИ» маңызды рөл атқарады.
Жалпы, қабылданған шаралар жол сапасын арттырып, Қазақстанның транзиттік әлеуетін күшейтуге және көлік инфрақұрылымын жаңа деңгейге шығаруға мүмкіндік береді.
