Қазақстанда халықтың табысы 2025 жылдың IV тоқсанында жан басына шаққандағы орташа ақшалай табыс 374,3 мың теңгеге жетіп, айына 124,8 мың теңгені құрады, деп хабарлайды QazMonitor. Бұл өткен жылдың сәйкес кезеңімен салыстырғанда номиналды түрде 9,2%-ға жоғары.
Алайда инфляцияны ескергенде нақты табыс төмендеген. Жылдық мәнде көрсеткіш -2,9%-ды құрады. Бұл деректер ҚР СЖРА Ұлттық статистика бюросының мәліметтері негізінде есептелген.
Нақты табыстың төмендеуі қатарынан үшінші тоқсан жалғасып отыр. Бұған дейін III тоқсанда көрсеткіш -3,4%, ал II тоқсанда -2,2% болған. Соңғы жеті жылда мұндай үрдіс өте сирек тіркелген: бұған дейін нақты табыс тек 2022 жылдың IV тоқсанында ғана азайған (-1,6%).
Сарапшылардың мәліметінше, бұл кезеңдерде тауарлар мен қызметтердің бағасы халық табысынан жылдамырақ өскен.
Жалпы табыстың негізгі бөлігін еңбек қызметінен түсетін кірістер құрайды — IV тоқсанда оның үлесі 75% болды. Дегенмен дәл осы көрсеткіш 2025 жыл бойы нақты мәнде төмендеп отырған. Әсіресе соңғы екі тоқсанда құлдырау айқын байқалды: шілде-қыркүйекте -3,6%, ал қазан-желтоқсанда -3,3% тіркелді.
Айта кету керек, жан басына шаққандағы орташа табыс деректері үй шаруашылықтарын іріктеп зерттеу нәтижесінде қалыптасады. Бұл есепке жалақыдан бөлек зейнетақы, шәкіртақы, жәрдемақы, атаулы әлеуметтік көмек және басқа да кірістер кіреді. Сондықтан бұл көрсеткіш нақты бір адамның табысын толық сипаттамайды.
Бұған дейінгі тоқсанда орташа табыс пен орташа жалақы да бір мезгілде нақты төмендеуді көрсеткен. IV тоқсан бойынша жалақы деректері әлі жарияланған жоқ, сондықтан бұл үрдістің сақталған-сақталмағаны әзірге белгісіз.
