Қызылордада қайта жаңғыртылған Президент паркінің салтанатты ашылу рәсімі өтті, деп хабарлайды QazMonitor.
Жаңа саябақ «Таза Қазақстан» жалпыұлттық жобасы аясында жүзеге асырылған абаттандыру жұмыстарының бір бөлігі саналады. Жоба шеңберінде өңірде санитарлық тазалықты сақтау, қоғамдық кеңістіктерді жаңарту және тұрғындарға қолайлы орта қалыптастыру бағытында кешенді жұмыстар жүргізілуде.
Соңғы жылдары Қызылордада бірыңғай дизайн код енгізіліп, елді мекендердің сәулеттік келбеті жаңартылып келеді. Көпқабатты тұрғын үйлердің қасбеттері заманауи панельдермен қапталып, аулаларда балалар ойын және спорт алаңдары салынуда.
Жаңартылған Президент паркі заманауи инфрақұрылыммен жабдықталған. Мұнда субұрқақтар, амфитеатр, спорт және ойын алаңдары, би және шахмат аймақтары, футбол мен баскетбол алаңдары орналастырылған. Сондай-ақ биіктігі 50 метрлік айналмалы шолу дөңгелегі, велосипед және жүгіру жолақтары, санитарлық пункттер бар.
Жалпы аумағы 31 гектар болатын саябаққа 2 мыңнан астам ағаш, 50 мыңнан астам сәндік бұта және 17 түрлі көпжылдық гүл отырғызылған.
Саябақ аумағын дамыту аясында бірқатар ірі жобалар да қолға алынған. Атап айтқанда, 6 гектар жерде 300 орындық балалар лагері, 2,4 гектарда ботаникалық білім беру орталығы, сондай-ақ 8,2 гектарда тоғыз қабатты 15 тұрғын үй салынуда. Бұдан бөлек, 200 орындық перинаталдық орталықтың құрылысы жүргізілуде. Алдағы уақытта жаңа драма театр мен Президенттік кітапхана салу жоспарланған.
Салтанатты рәсім барысында саябақты қайта жаңғыртуға үлес қосқан мердігер ұйым өкілдері мен экологиялық бастамаларға белсенді қатысқан еріктілер марапатталды.
