Қазақстан мектептерінде «Адал азамат» біртұтас тәрбие бағдарламасы аясында бірыңғай дизайн-код енгізілуде, деп хабарлайды QazMonitor.
Бағдарламаны көрнекі сүйемелдеу мақсатында заманауи брендбук әзірленді. Құжатта бағдарламаның негізгі құндылықтары мен идеясын айқындайтын шығармашылық стильдер, түстер палитрасы, макеттер және мектеп кеңістігін заманауи форматта безендіруге арналған элементтер қамтылған.
Бағдарлама мазмұнына сәйкес білім беру ұйымдары үшін бірыңғай дизайн-код қалыптастырылып, мектептердің ішкі кеңістігін брендбук талаптарына сай кезең-кезеңімен безендіру жұмыстары жүргізілуде. Дизайн-кодта бағдарламаның алты негізгі құндылығын айшықтайтын безендіру үлгілері қарастырылған.
Заманауи брендбук аясында пән кабинеттері оқушылардың жас ерекшеліктеріне және пән бағытына сәйкес рәсімделуі тиіс.
Жергілікті атқарушы органдардың мәліметінше, бастапқы кезеңде брендбук 530 білім беру ұйымында енгізіледі. Қазіргі уақытта 267 мектепте көрнекі элементтерді орналастыру жұмыстары аяқталған.
Алдағы уақытта дизайн-код реновация бағдарламасы аясында жөндеу жүргізілетін мектептерде енгізіліп, кейін кезең-кезеңімен еліміздің барлық білім беру ұйымдарына таратылады.
Айта кетейік, брендбук динамикалық құжат болып саналады және білім беру ұйымдарының ерекшеліктеріне қарай үнемі толықтырылып, жетілдіріліп отырады.
