Жамбыл облысында «Таза Қазақстан» акциясы аясында жасыл желектерді цифрландыру жұмыстары қолға алынды, деп хабарлайды QazMonitor. Қазіргі таңда бұл бағыттағы жұмыстар Тараз қаласында жүргізілуде.
Арнайы taraz.botsad.kz платформасына бүгінге дейін 31 мың түп жасыл желек туралы мәлімет енгізілген. Жоба аясында ағаштарды түгендеу, олардың жай-күйін бақылау және күтіп-ұстау процесін жүйелеу көзделген.
Айта кетейік, цифрландыру жобасын іске асыру 2026–2028 жылдар аралығында жалғасады. Алайда өңірдің басқа қалаларында, атап айтқанда Жаңатас, Қаратау және Шу қалаларында бұл бағыттағы жұмыстар әлі басталмаған.
Сонымен қатар «Таза Қазақстан» акциясының аясында тұрғындардан өтінім қабылдайтын Telegram-бот та жұмыс істейді. Жыл басынан бері сервиске 237 өтінім түсіп, олардың басым бөлігі қаралған.
Цифрландыру бастамалары жасыл желектерді тиімді басқаруға және оларды күтіп-ұстау сапасын арттыруға мүмкіндік береді.
