Елорда жолдарының сапасын сақтау және жол қауіпсіздігін арттыру мақсатында 2026 жылдың 1 сәуірінен бастап ауыр жүк көліктерінің қозғалысына қатаң бақылау енгізілді, деп хабарлайды QazMonitor.
Бұл шара жол жабынының мерзімінен бұрын зақымдануын болдырмауға бағытталған.
Бақылау қалай жүргізіледі?
Қалаға кіре беріс және шыға беріс негізгі бағыттарда арнайы көлік бақылау топтары кезекшілік етеді.
Сонымен қатар жол бойында орнатылған заманауи салмақ өлшеу жүйелері көлікті тоқтатпай-ақ оның салмақ параметрлерін анықтайды.
Еске сала кетейік, 23 наурыздан 1 мамырға дейін республикалық маңызы бар жолдарда көлік құралдарының осьтік жүктемесіне қосымша уақытша шектеулер қолданылады. Бұл топырақтың жібуі кезінде жолдың «отырып» кетпеуі үшін жасалатын стандартты алдын алу шарасы.
Егер көліктің рұқсат етілген салмақ параметрлері асып кетсе, заң бойынша әкімшілік айыппұлдар қарастырылған. Айыппұл мөлшері бұзушылықтың деңгейіне (артық жүк көлеміне) байланысты белгіленеді.
