Қазақстанда медицина қызметкерлерінің атын жамылған алаяқтық қоңыраулар жиілеп кетті. Осыған байланысты Денсаулық сақтау министрлігі азаматтарға сақтық шараларын қатаң сақтауды ескертіп отыр, деп хабарлайды QazMonitor.
Әлеуметтік желілерде емханаларға барғаннан кейін күмәнді қоңыраулар түсетіні туралы ақпарат таралуына байланысты министрлік белгісіз тұлғаларға SMS-кодтарды және жеке деректерді бермеуге, сондай-ақ күмәнді сілтемелерге өтпеуге шақырады.
Ведомствоның мәліметінше, мұндай жағдайлар еліміздің әртүрлі өңірлерінде тіркелуде және әдетте медициналық ұйымдардың қызметімен байланысты емес. Алаяқтар азаматтардың, соның ішінде егде жастағы адамдардың сенімін пайдаланып, өздерін емхана немесе басқа мекеме қызметкерлері ретінде таныстырады.
Денсаулық сақтау министрлігі мынадай сақтық шараларын ұстануға кеңес береді:
SMS-кодтарды және жеке деректерді үшінші тұлғаларға бермеу;
телефон арқылы алынған ақпараттың шынайылығын тексеру;
күмәнді қоңыраулар түскен жағдайда өз медициналық ұйымына немесе құқық қорғау органдарына жүгіну.
Азаматтарға тіркелу мәртебесін дербес тексеру үшін eGov.kz/eGov Mobile порталы мен Damumed қосымшасын пайдалану ұсынылады.
Медициналық ұйымдарға жазылу eGov.kz, eGov Mobile платформалары, медициналық ақпараттық жүйелердің мобильді қосымшалары арқылы немесе тіркеу бөліміне телефон шалу арқылы жүзеге асады. SMS-кодтар пациенттерге тек цифрлық сервистерде авторизациядан өту кезінде ғана жіберіледі. Медициналық ұйым қызметкерлері телефон арқылы SMS-код сұрамайды.
Министрлік аталған жағдайлар азаматтарды жаңылыстыру арқылы олардың жеке деректері мен қаржылық сервистеріне қол жеткізуге бағытталған кең таралған алаяқтық схемалардың белгілеріне сәйкес келетінін атап өтті.
