Әбілқас Сағынов атындағы Қарағанды техникалық университетінде «Ұшқышсыз басқарылатын авиациялық жүйелер» атты жаңа бағыт іске қосылып, қазіргі таңда 35 студент білім алуда, деп хабарлайды QazMonitor.
Оқыту барлау және топогеодезия бағыты бойынша жүргізіледі. Студенттер дрондарды басқарумен қатар деректерді талдау, жергілікті жерде бағдарлау, жедел шешім қабылдау және есептоп құрамында үйлесімді әрекет ету дағдыларын меңгереді.
Практикалық сабақтар барысында студенттер ішкі полигонда және күрделі құрылыс жағдайында түрлі тапсырмаларды орындайды. Болашақ мамандар әуе барлауын жүргізу, нысандарды анықтау, деректерді нақты уақыт режимінде жеткізу және интернетсіз автономды байланыс арналары арқылы жұмыс істеуді үйренеді.
Дайындықтың соңғы кезеңінде курсанттар атыс жүйелерімен интеграцияны меңгереді. Олар нысан координаттарын дәл беру, оқ атуды түзету және тапсырмаларды жоғары дәлдікпен орындау дағдыларын пысықтайды.
«Мамандарды даярлау теориялық білім мен практикалық машықтарды ұштастыра отырып жүргізіледі. Командалық жұмысқа және жоғары технологиялық техниканы меңгеруге ерекше назар аударылады. Біздің студенттер дрондар бойынша жарыстарда да жоғары нәтиже көрсетіп жүр. Мысалы, AITU KazRoboDrone байқауында университет командасы өткен жылы республикада бірінші, ал халықаралық деңгейде төртінші орын алды», – деді «Арнайы әскерлерді ұрыста қолдану» циклының басшысы, запастағы подполковник Марат Истемесов.
Жалпы дайындық үдерісі тәжірибеге негізделген және ұрыс жағдайына барынша жақын форматта ұйымдастырылған. Курсанттар виртуалды тренажерлерден бастап күрделі тактикалық тапсырмаларға дейінгі толық циклден өтеді. Оқу барысында заманауи барлау дрондары мен маневрлік FPV-дрондар қолданылады.
Студенттер техниканың құрылысын меңгеріп қана қоймай, аппараттарды құрастыру мен бағдарламалауды да үйренеді. Сонымен қатар олар шектеулі байланыс пен радиоэлектрондық кедергілер жағдайында әрекет ету дағдыларын игереді.
