Қазақстанда кәмелетке толмағандар арасындағы қылмыс деңгейі айтарлықтай төмендеді. Бұл туралы Бас прокуратура «Заң мен тәртіп» идеологемасы аясында жүзеге асырылып жатқан профилактикалық жобалардың нәтижесін қорытындылай отырып мәлімдеді, деп хабарлайды QazMonitor.
Ведомство мәліметінше, өңірлерде цифрлық технологияларды, тәрбиелік және алдын алу жұмыстарын біріктіретін жаңа форматтағы жобалар енгізілген. Олар нақты көрсеткіштер арқылы тиімділігін дәлелдеген.
Мәселен, Атырау облысында жүзеге асырылып жатқан «5 минуттық құндылық» жобасы 235 мектеп пен 154 мың оқушыны қамтыды. Жобаның басты ерекшелігі – әр сабақтың алдында оқушылармен құндылықтарға қатысты қысқа талқылау өткізіледі.
Бір оқу күні ішінде барлық пәнде бір тақырып қарастырылады. Мысалы, құрмет, жауапкершілік немесе тәртіп. Мұғалімдер оны өз пәнімен байланыстырып, өмірлік мысалдар арқылы түсіндіреді. Сабақтар пікірталас, ойын элементтері, қысқа бейнероликтер мен жағдайларды талдау форматында өтеді.
«Нәтижесінде тәрбиелік жұмыстың уақыты айына 180 минуттан 500 минутқа дейін ұлғайды. Сауалнама деректеріне сәйкес, оқушылардың 90%-дан астамы жүйелі жұмысты атап өтсе, 94,7%-ы құндылықтардың тұрақты талқыланатынын көрсеткен, ал 79,5%-ы отбасын негізгі құндылық деп санайды. Кәмелетке толмағандар арасындағы қылмыс деңгейі 61,5%-ға төмендеді (52-ден 20-ға дейін)», делінген Бас прокуратура хабарламасында.
Ал Қызылорда облысында өткен жылдан бері «AdalBala» цифрлық платформасы енгізілген. Жоба оқушылардың құқықтық және медиасауаттылығын арттыруға бағытталған.
Платформада буллинг, киберқауіпсіздік, қаржылық сауаттылық, сыбайлас жемқорлыққа қарсы мәдениет, цифрлық тәуелділік және өмірлік дағдылар бойынша интерактивті сабақтар ұсынылады. Оқыту анимациялық бейнероликтер, тесттер мен практикалық тапсырмалар арқылы жүргізіледі.
Жоба 300 мектепті немесе 180 мың оқушыны қамтыған. Нәтижесінде өңірде жасөспірімдер арасындағы құқық бұзушылық 20%-ға азайған.
