Шымкент әуежайында жаңа ұшу-қону жолағының құрылысы жүріп жатыр, деп хабарлайды QazMonitor.
Жоба тек жаңа жолақты салумен шектелмей, қажетті инфрақұрылымды дамытуды да қамтиды. Атап айтқанда, рулеждік жолдар, ИКАО-ның III санаттағы жарық-сигналдық жабдықтары, авариялық-құтқару қызметтері, инженерлік желілер және периметрлік қоршау қарастырылған.
Аталған жобаны іске асыру нәтижесінде әуежайда екі ұшу-қону жолағы жұмыс істейтін болады. Бұл рейстер санын едәуір арттыруға, халықаралық бағыттар желісін кеңейтуге және күрделі ауа райы жағдайларында әуежайдың үздіксіз жұмысын қамтамасыз етуге мүмкіндік береді.
Сонымен қатар, жоба барлық үлгідегі ірі жүк әуе кемелерін қабылдауға жағдай жасап, Шымкентті карго-хаб ретінде дамытуға жол ашады.
