Көлік министрі Нұрлан Сауранбаев үкімет отырысында Q-Gate жүйесі — паспорттық бақылаудан өз бетінше өтуге арналған автоматтандырылған мультибиометриялық терминал — Астана және Алматы әуежайларында іске қосылып қойғанын мәлімдеді, деп хабарлайды Kapital.kz іскерлік ақпарат орталығы.
«Қазіргі уақытта Астана және Алматы әуежайларында 16 терминал жұмыс істеп тұр. Биыл Шымкент, Атырау, Ақтөбе және Ақтау қалаларында тағы 16 терминал орнату жоспарлануда — әр әуежайда төрт терминалдан», — деді Нұрлан Сауранбаев.
Көлік министрлігінің мәліметінше, бұл технология бақылаудан өту уақытын үш минуттан 50 секундқа дейін қысқартуға мүмкіндік береді.
Цифрландырудың келесі кезеңі ішкі авиарейстерде биометрияны енгізу болмақ. Пилоттық жобаны Астана — Шымкент бағытында жүзеге асыру жоспарлануда.
Өзгерістер жүк тасымалына да қатысты болады. Авиация саласына e-Freight жүйесі енгізілуде, бұл жүктерді өңдеуді жылдамдатуға және процестерді толықтай цифрлық форматқа көшіруге мүмкіндік береді.
«Жүк сегментінде e-Freight жүйесі енгізіліп жатыр. Бұл жүктерді өңдеу уақытын 1 күннен 1 сағатқа дейін қысқартуға және процестерді толық цифрландыруға мүмкіндік береді», — деп атап өтті министр.
Айта кетейік, Қазақстанның барлық әуежайларында жолаушыларды биометриялық тексеруден өткізуді енгізу 2024 жылы-ақ жарияланған болатын.
