2026 жылы Алматыда шамамен 270 шақырым электр желісі жаңғыртылып, бірқатар қосалқы станция мен тарату пункті қайта жөнделеді, деп хабарлайды QazMonitor.
Жөндеу маусымы аясында қалада 10/6/0,4 кВ кернеулі 269,79 шақырым электр желісін қайта құру жоспарланған. Оның ішінде 210 шақырымы — 10/6 кВ кабель желілері. Бұл жұмыстар Алмалы, Бостандық және Наурызбай аудандарында жүргізіледі. Сонымен қатар Алмалы, Наурызбай және Алатау аудандарында 0,4 кВ әуе желілерінің шамамен 60 шақырымы жаңартылады.
Бұдан бөлек, үш тарату пункті мен 22 трансформаторлық қосалқы станция қайта жаңғыртылады. «Есентай», «Шоссейная» және «Жас Қанат» қосалқы станцияларын жаңарту да жоспарланған.
Жетісу және Түрксіб аудандарында ұзындығы 30 шақырымнан асатын 110 кВ электр беру желілері жаңартылып, ескі сымдар заманауи композиттік сымдарға ауыстырылады.
Өткен жылы қалада 238 шақырым желі жаңғыртылған. Салыстырмалы түрде 2024 жылы — 140 шақырым, 2023 жылы 162 шақырым желі жөнделген.
Қазіргі таңда электр желілерінің ең жоғары тозу деңгейі Түрксіб, Медеу және Наурызбай аудандарында тіркелген. Осыған байланысты аталған аудандарда инфрақұрылымды жаңарту жобаларына басымдық беріліп отыр.
Алматының электр желілік кешені елдегі ең ірі жүйелердің бірі. Қаладағы электр беру желілерінің жалпы ұзындығы 30,8 мың шақырымнан асады. Сонымен қатар Алматыда 206 қосалқы станция және 7,3 мыңнан астам трансформаторлық қосалқы станция мен тарату пункті жұмыс істейді.
