Алматыда инженерлік инфрақұрылымды ауқымды жаңғырту жұмыстары жалғасуда. 2026 жылы сумен жабдықтау желілерінің тозу деңгейін 49%-ға, ал су бұру желілерінің тозуын 48%-ға дейін төмендету жоспарланып отыр, деп хабарлайды QazMonitor.
Қалалық энергетика және сумен жабдықтау басқармасының басшысы Нұрбақыт Серікбайдың айтуынша, 2025 жылы Алматыда 390,7 шақырымнан астам сумен жабдықтау желісі салынып, жаңғыртылған. Соның нәтижесінде желілердің тозу деңгейі 51%-ға дейін төмендеген.
«Қазір қалада кезекті жөндеу маусымы басталды. 2026 жылы тағы 339,1 шақырым су желісін салу және жаңғырту жоспарланып отыр. Бұл тозу деңгейін 49%-ға дейін төмендетуге және коммуналдық инфрақұрылымның сенімділігін арттыруға мүмкіндік береді. Бұл жұмыс Алматының барлық ауданында жүйелі түрде жүргізілуде», – деді Нұрбақыт Серікбай.
Су бұру саласында да жаңғырту жұмыстары жалғасуда. Өткен жылы 311,9 шақырым желі салынып, жаңартылса, биыл тағы 285,1 шақырым желіні іске қосу жоспарланған. Бұл көрсеткіш тозу деңгейін 48%-ға дейін төмендетуге мүмкіндік береді.
Қалада коммуналдық саланы цифрландыру аясында АСУТП автоматтандырылған басқару жүйелері енгізілуде. Бұл жүйелер су және су бұру нысандарын тәулік бойы бақылауға мүмкіндік береді.
Сондай-ақ Алматыда су ресурстарын үнемдеу бағытында көлік жуу орындарына қойылатын талаптар күшейтілген. Қазіргі таңда 162 нысанда суды қайта пайдалану жүйелері орнатылған, оның 33-і биыл іске қосылған.
2026 жылғы 1 мамырдағы жағдай бойынша талаптарға сай келмеген 146 автожуу орнының жұмысы тоқтатылған.
