Ішкі істер министрлігі интернетте алаяқтар жасөспірімдерді банк карталарымен байланысты заңсыз схемаларға тартуы мүмкін екенін ескертті.
Әдетте бәрі мессенджерде, онлайн ойында немесе әлеуметтік желіде бір хабарламадан басталады. Бейтаныс адам жеңіл табыс ұсынып, картаға түскен ақшаны басқаға жіберуді немесе қолма-қол ақшаға айналдыруды сұрайды. Шын мәнінде бұл ұрланған қаражатты жымқыру схемасы болып саналады.
Алаяқтар ізін жасыру үшін дроптарды пайдаланады: ақша бөгде шоттар арқылы өтіп, ал ұйымдастырушылар жасырын қалады.
Мұндай операцияларға тіпті байқамай қатысу да ауыр салдарға әкелуі мүмкін.
ІІМ банк картасының деректерін және банк қосымшалары туралы мәліметті бөгде адамдарға бермеу, ақшаны аудару арқылы «жеңіл табыс табу» туралы ұсыныстарға келіспеу және күдік туындаса, міндетті түрде ата-анаға немесе жасөспірімдер өздері сенетін ересек адамға хабарлау қажеттігін ескертті.
