Қазақстандағы ірі инфрақұрылымдық жобалардың бірі – республикалық маңызы бар «Қарағанды – Жезқазған» автожолының құрылысы басталды. Ұзындығы 457 шақырым болатын жолдың 122 шақырымы Қарағанды облысының аумағы арқылы өтеді. Жобаның тапсырыс берушісі – «ҚазАвтоЖол» ҰК» АҚ. Бұл туралы Қарағанды облысы әкімдігінің баспасөз қызметіне сілтеме жасап QazMonitor.
Құрылыс жұмыстарының басталу рәсіміне премьер-министрдің бірінші орынбасары Нұрлыбек Нәлібаев, Қарағанды облысының әкімі Ермағанбет Бөлекпаев, Ұлытау облысының әкімі Дастан Рыспеков және «ҚазАвтоЖол» ҰК» АҚ басқарма төрағасы Дархан Иманашев қатысты.
Нұрлыбек Нәлібаевтың айтуынша, бұл жоба еліміздің көлік инфрақұрылымын дамытудағы маңызды кезеңдердің бірі.
«Бүгін біз үшін тарихи күн – «Қарағанды – Жезқазған» автомобиль жолын реконструкциялау жұмыстарын бастаймыз. Бұл – Қазақстанның көлік жүйесі үшін стратегиялық маңызы бар негізгі инфрақұрылымдық жобалардың бірі. Болашақта бұл жол солтүстік және орталық өңірлерді еліміздің оңтүстігімен байланыстыратын маңызды көлік дәлізіне айналады. Жолдың дайын учаскелері бүкіл жоба толық аяқталмай-ақ кезең-кезеңімен пайдалануға беріледі», – деді ол.
Жаңа автожол қолданыстағы трассаға қатар салынады. Жобаға сәйкес II техникалық санаттағы, заманауи қауіпсіздік және сапа талаптарына сай екі жолақты автомобиль жолы бой көтереді.
«ҚазАвтоЖол» ҰК» АҚ басқарма төрағасы Дархан Иманашевтың айтуынша, жоба алғаш рет DBM (Design – Build – Maintain) қағидаты бойынша жүзеге асырылады. Бұл форматта мердігер ұйым нысанның жобалануынан бастап құрылысына және пайдалануға берілгеннен кейінгі жеті жыл бойы күтіп-ұстауына дейін толық жауап береді.
«Мұндай тәсіл жобалаушылар мен құрылысшылар арасындағы келіспеушіліктердің алдын алып, жобаның қымбаттау және мерзімінің созылу тәуекелдерін азайтады. Барлық жауапкершілік мердігердің мойнында болғандықтан, жобаны іске асыру тиімді әрі ашық болады. Жол құрылысын 2029 жылы аяқтап, қозғалысты ашуды жоспарлап отырмыз», – деді Дархан Иманашев.
Құрылыс жұмыстары бір мезгілде төрт учаскеде жүргізіледі. Қазір мердігерлер құрылыс алаңдарын дайындап, жобалау және жер жұмыстарына кірісті.
Қарағанды облысының әкімі Ермағанбет Бөлекпаев жаңа жол өңірдің әлеуметтік-экономикалық дамуына серпін беретінін айтты.
«Осы маңызды жобаны қолдағаны үшін мемлекет басшысы мен үкіметке алғысымды білдіремін. Бұл жол өңірлерді ғана емес, адамдарды да байланыстырып, жаңа мүмкіндіктерге жол ашады. Оның іске асуы өңірдің дамуына тың серпін береді деп сенемін», – деді облыс әкімі.
Жоба аяқталғаннан кейін өңірлер арасындағы көлік қатынасы жақсарып, жол қозғалысының қауіпсіздігі артады және жол жүру уақыты айтарлықтай қысқарады.
Ұлытау облысының әкімі Дастан Рыспеков бұл жобаны өңір тұрғындары ұзақ жылдан бері күткенін атап өтті.
«Бұл республикалық маңызы бар жолдың реконструкциясын тек облыс тұрғындары ғана емес, мыңдаған жүргізуші мен жолаушы да асыға күтті. Жобаны қаржыландыру мәселесі шешілгенде, бұл барша үшін қуанышты жаңалық болды», – деді ол.
Еске салайық, бұған дейін «Қарағанды – Жезқазған» автожолының құрылысы мамыр айында басталатыны хабарланған болатын.
Сондай-ақ 2026 жылдың наурыз айында «Қызылорда – Ақтөбе» автожолын төрт жолаққа дейін кеңейтудің бірінші кезеңі басталды. Биыл Транскаспий халықаралық көлік бағыты аясында «Бейнеу – Сексеуіл» жобасын іске асыру да жоспарланып отыр. Бұл бағытты шамамен 1000 шақырымға қысқартып, жүк жеткізу мерзімін үш тәулікке дейін азайтуға мүмкіндік береді.
