2026 жылғы 1-29 маусым аралығында Алматыда жылжымалы экологиялық зертханалар 778 автокөлікті пайдаланылған газдардың уыттылығы мен түтін деңгейінің белгіленген нормаларға сәйкестігіне тексерді, деп хабарлайды QazMonitor.
Мониторинг Алматы қаласы Полиция департаментінің қызметкерлерімен бірлесіп жүргізілді. Іс-шаралар атмосфералық ауаны қорғау қағидаларын іске асыру және зиянды шығарындыларды азайту мақсатында ұйымдастырылған.
Тексеру қорытындысы бойынша 194 автокөліктен экологиялық талаптардың бұзылғаны анықталды. Оның ішінде 106 көлік – бензинмен, 86 көлік – дизельмен, ал екі көлік газбен жүреді.
«Eco Almaty» мәліметінше, мұндай рейдтер тұрақты түрде өткізіліп келеді. Олар қаладағы ауаны ластаушы негізгі көздердің бірі саналатын автокөліктерден шығатын зиянды заттардың көлемін азайтуға бағытталған. Қазіргі уақытта жылжымалы экологиялық зертханалардың жұмысы жалғасып жатыр.
