2027 жылы Астанада киберспорттан әлем чемпионаты – IESF World Esports Championship 2027 өтеді. Бұл туралы Астанада Қазақ ұлттық спорт университетінің ресми ашылу рәсімі аясында өткен келісімге қол қою барысында белгілі болды, деп хабарлайды QazMonitor.
Іс-шара барысында Қазақстан Республикасы Туризм және спорт министрлігі, Халықаралық киберспорт федерациясы (IESF) және Қазақстан киберспорт федерациясы арасында үшжақты меморандумға қол қойылды. Құжат әлем чемпионатын Қазақстанда өткізу және халықаралық киберспортты дамыту бағытындағы ынтымақтастықты жаңа деңгейге шығаруға бағытталған.
Сонымен қатар Қазақ ұлттық спорт университеті мен IESF арасында әріптестік туралы келісім жасалды. Ол мамандарды бірлесіп даярлау, білім беру бағдарламаларын жетілдіру, ғылыми зерттеулер жүргізу және киберспорт саласындағы халықаралық жобаларды іске асыруды көздейді.
Ұйымдастырушылардың мәліметінше, 2027 жылғы әлем чемпионаты цифрлық спорт саласындағы Қазақстанда өтетін ең ірі халықаралық жарыстардың бірі болмақ. Турнирге әлемнің ондаған елінен ұлттық құрамалар, киберспорт индустриясының жетекші өкілдері, халықаралық спорт федерациялары, білім және ғылым саласының мамандары, сондай-ақ технологиялық компаниялардың өкілдері қатысады.
Халықаралық киберспорт федерациясының президенті Влад Маринеску Қазақстанның білім беру мен инновацияларды дамытуға және халықаралық ынтымақтастықты нығайтуға бағытталған ұстанымын жоғары бағалап, елдің әлем чемпионатын жоғары деңгейде өткізетініне сенім білдірді.
Сондай-ақ Қазақ ұлттық спорт университетінің құрылтайшысы Нұрасыл Медеудің IESF департаментінің директоры қызметін атқаруы университет пен халықаралық федерация арасындағы ынтымақтастықты күшейте түсетіні атап өтілді. Бұл бірлескен білім беру бағдарламаларын, академиялық алмасуды, ғылыми зерттеулер мен халықаралық жобаларды дамытуға мүмкіндік береді.
Қол қойылған келісімдер Қазақстанның спорт, білім беру және цифрлық технологиялар салаларындағы халықаралық позициясын нығайтуға бағытталған. Ал 2027 жылғы әлем чемпионатын өткізу елдің жаһандық киберспорт кеңістігіндегі рөлін күшейтетін маңызды оқиға болмақ.
