Елордада жоғалған азаматтардың жүрген жерін анықтауға бағытталған жедел-іздестіру іс-шаралары барысында ұшқышсыз ұшу аппараттары (дрондар) маңызды рөл атқарып отыр, деп хабарлайды QazMonitor.
Дрондар жер үстінен іздеу жүргізу қиын немесе мүмкін емес аумақтарда қолданылады. Атап айтқанда, су айдындары, қамыс қалың өскен жерлер, орман алқаптары, батпақты аймақтар және қалалық бейнебақылау жүйесі қамтымайтын аумақтар әуеден шолу арқылы тексеріледі.
Полиция қызметкерлерінің айтуынша, әуеден жүргізілетін мониторинг кең аумақтарды қысқа уақыт ішінде қарап шығып, іздеу бағытын жедел нақтылауға мүмкіндік береді.
Жыл басынан бері Астанада азаматтардың із-түзсіз жоғалуына қатысты 3 мыңнан астам өтініш тіркелген. Олардың қатарында кәмелетке толмағандар, ересектер және егде жастағы азаматтар бар. Сондай-ақ балық аулауға немесе серуендеуге шығып, әртүрлі себептермен байланысқа шықпай қалған адамдарға қатысты жағдайлар да жиі кездеседі.
Осындай жағдайларда дрондарды қолдану іздестіру жұмыстарын айтарлықтай жеделдетіп, қиын қолжетімді аумақтарды тексеру тиімділігін арттырады. Бірқатар жағдайда әуеден түсірілген деректер жоғалған азаматтарды табуға немесе олардың болуы мүмкін аумағын нақтылауға көмектескен.
Заманауи технологиялармен қатар іздестіру жұмыстарына полиция қызметкерлері мен қызметтік иттер де тартылады. Техникалық құралдарды енгізу жедел әрекет ету жылдамдығын арттырып, азаматтардың өтініштеріне дер кезінде жауап беруге мүмкіндік береді.
